قصة جديده الجزء الثاني ❤ - اليك القصة

قصة جديده الجزء الثاني ❤ - اليك القصة

غرفة الفندق 1125
الحلقة التانيه والاخيرة
كان في مكان باب ورا الدولاب لكن متسدد بخشب خفيف [أبلكاش] ومدهون بنفس لون الجدار,, زي ما يكون أن الغرفتين كانوا موصولين ببعض زمان,
حسيت بالأمل وكسرت الباب برجلي فلقيت غرفة زي غرفتي لكن مظلمه ومحروقه بالكامل, الغرفة عبارة عن رماد,, بقايا سرير محروقة وبقايا دولاب والجدران والأرضية والسقف كله أسود في اسود,, حتى حمامها كله غبار أسود,, حسيت برعشه بتسري في جسمي
أمال مين اللي كان بيخبط على الجدار,, مكنش ليها باب منها للممر الخارجي, تقريبا كانت غرفه ملحقه بغرفتي قبل ما يسدوا عليها  وكان الشباك متسمر بالخشب,, وكأن السجن بقى أوسع
رجعت غرفتي بسرعه لما لقيت حشرات زي الخنافس ماليه الغرفة وبتزحف على رجلي وفي منها بيطير, فجريت على غرفتي ورجعت الدولاب مكانه لكن بدأت اسمع صوت خربشة ورا الدولاب,, ولقيت الخنافس دي بدأت تتسلل من ورا الدولاب والمرعب أنها بدأت تطير في الغرفة بتاعتي بكثافه واتلم عدد كبير منها حوالين اللمبه لغاية ما بقت غرفتي مظلمه ومن بعدها بدأت باقي الخنافس تهاجمني وأنا مش شايفها بس كنت بحس بصوت زنه غريبه بيقرب مني  بعدها كانت بتيجي على جسمي وتقرصني كنت بحس أنها بتسحب من دمي لما تلمسني وأنا عمال أطوح أيديا يمين وشمال عشان أبعدهم عني وبصرخ ألحقوني هموووت, وطلعت أجري عالحمام وقفلت بابه عليا وقلعت هدومي سديت بيها الفراغ اللي تحت الباب وكان في حشرتين دخلو قتلتهم بايدي, كانوا وهم بيموتو بيطلعوا صوت زي صوت صرخه مكتومه,, لكن بمجرد ما قتلتهم حسيت أن الحشرات اللي بره بترزع في باب الحمام وكأنها حست بقتل أخواتها وعايزه تنتقم عرفت ساعتها أن الخبط اللي كان في الأوضه التانيه كان خبط الحشرات في الابلكاشه,  ساعتها كان ألم صدري بيزيد وبدأت أنهج ,, فجاتلي فكرة أني أملى البانيو ماية عشان لو قدروا يدخلوا اغطس فيها,, شديت ستارة البانيو فلقيت فيه بنت صغيرة نايمه لونها باهت زي الاموات وشعرها منكوش ومغطي وشها, فشديت ستارة البانيو عليها تاني ووقعت على الارض والألم اللي في صدري بدا يبقى زي سكينة ,,
فسمعتها بتدندن تاني من ورا الستارة, ساعتها مكنتش قادر اعمل أي حاجه غير أني أحط أيدي على عينيا واستسلم لموت بطيء, خاصة بعد ما بدأت الحشرات تدخل من تحت الباب حشرة ورا التانية وفجأة نطت في دماغي فكرة,, قمت فتحت سيفون الحمام وأخدت القطعه النحاس اللي جواه ولبست هدومي وطلعت من الحمام على الباب وانا بطوح أيديا عشان الحشرات متقرصنيش وحاولت أحط حتة النحاس مكان الأوكره وأفتح بيها وبالفعل دخلت مكان الاوكره لكن وانا بلفّها أتكسرت,, فطلعت الحتة اللي اتكسرت وطلعت أجري على الحمام بتاع الغرفة التانية,, مكنتش مهتم بالقرص والحشرات وبقول دا اخر أمل ليا وفتحت السيفون وكانت المفاجأة أني لقيته مفيهوش ميه ولا فيه قطعه نحاس كل اللي كان فيه قطعة جلد حيوان منقوشة بطلاسم شكلها غريب,, عرفت أن ساعتها دا سحر ومعمول للمكان ده, وهو سبب وجود الحشرات وجنيه متجسده في صورة طفله صغيرة
طب هحرق السحر أزاي أو أجيب ميه بملح أحطه فيه منين,, كانت الحشرات بدات تكتر على جسمي وألم صدري مع المجهود والانفعال كأن السكينة بتتغرز فيه أكتر ,, أخدت قطعة الجلد والفكرة الوحيده اللي جات في دماغي أن سائل الاستحمام فيه ملح فرحت على الحوض سديته وفتحت المية السخنه كانت تقريبا بتغلي ومليت حوض الوجه وحطيت فيه سائل الاستحمام وغطست فيه السحر وقعدت أدعك في الطلاسم في قلب المية السخنه وسائل الاستحمام, كان وقتها صوت الطفله جاي من ورا الستارة بس مكنش دنده كان بدأ يتحول لصريخ يصم الآذان وخيالها بقا واضح ورا الستارة وهي واقفه وحاطه أيديها على ودنها وبتصرخ, وقتها كانت تقريبا الكتابات اختفت بتأثير المية السخنه وسائل الاستحمام ودعكي بايدي ليها, سبت الحمام, وانا تقريبا معدتش قادر أخد نفسي نهائي  لغاية ما وصلت عند باب الغرفة ووقعت على ركبتيني وقعدت أخبط على الباب بآخر رمق فيا, وأنا تقريبا بموت
واضح اني كنت متشبث بالحياة لأقصى درجة, فوقت في المستشفى,, اتلحقت من أزمة قلبية على آخر لحظات, النزلا أول ما سمعوا الخبط بلغوا الاداره فطلعوا فتحولي, تقريبا السحر كان بيعزل الغرفة عن الزمكان المحيط لغاية ما تموت بالبطيء, عشان كده الأول كان صوت خبطي مبيوصلش, أما لما طمست السحر الصوت وصل
بعدها بأسبوع تقريبا خرجت من المستشفى ورفعت دعوى على ادارة الفندق ووكلت محامي, اللي قعد يفحر وراهم ,, وعرف كل التفاصيل,
الغرفتين زمان كانوا موصولين وبيتأجروا مع بعض, ومن عشرين سنة أقام فيها نزيل لمدة شهور, إدارة الفندق كانت بدأت تلاحظ تردد ناس غريبه عليه, وأصوات غريبة كانت بتتردد من غرفته في الليل وروائح كريهه بتطلع منها, فاشتكى منها النزلاء التانيين, فأخطرته إدارة الفندق بأنه مش مرحب بيه في المكان وقدامه تلت ليالي عشان يشوف مكان تاني,, وفي الليله اللي ترك فيها الفندق ولعت النار في الغرفة اللي كانت ملحقه بغرفتي ولمدة تلت ليالي كانت بتولع فيها النار كل ليله ,, لما جابوا حد عشان يرممها بيقولوا انه فضل فيها ساعات طويله ولما الادارة لاحظت أنه أتأخر راحو فتحوله لقوه منهار وبيحكي عن جنية متجسدة في صورة طفلة وحشرات بتطير وخيالات وأصوات , فعشان سمعة الفندق قرروا يعزلوا الغرفة دي عن الغرفة اللي انا استاجرتها وقرروا ميجيبوش صنايعيه تاني ويراضوا الصنايعي اللي كان فيها عشان ميحكيش,, وفي نفس الوقت مهانش عليهم يخسروا الغرفتين, فجابو الابلكاش وسمروه مكان الباب اللي كان واصل بين الغرفتين وواحد من موظفين الفندق دهنه وغطوا عليها بالدولاب,, الغرفة أتأجرت بعد الحادثه مره واحده في سنة الحادثة, النزيل اللي كان فيها راحوا فتحوا عليه لما منزلش لغاية الضهر لقوه ميت في الحمام بأزمه قلبيه,, ومن بعدها متأجرتش تاني وراح ناس وجه ناس على الفندق بس كله عارف أن الغرفه اللي جمب الغرفة المقفوله فيها حاجه مش طبيعيه,, وعدت السنين واللي كان حقيقي بقا مجرد اشاعه, لغاية ما وصلت أنا

تمت

بقلم/عبدالفتاح عبدالعزيز