لنتحدث الجزء الاول - اليك القصة

لنتحدث الجزء الاول - اليك القصة

لنتحدث ...

مشروع تخرجي ..

بتبدأ حكايتي و مآساتي بسبب مشروع تخرجي اللي نجحت فيه و نجح هو بامتياز ف تدمير حياتي .....

انا مين ؟

اسمي : عمرو حسان

طالب .... او كنت طالب ف جامعة خاصة درست فيها نظم و معلومات ادارية ، و سامحوني لو قولت طالب لأن الكلمة دي لسه على لساني لحد دلوقتي رغم اني اتخرجت من حوالي ٦ شهور .....

بتبدء حكايتي من قبل تخرجي بحوالي كام شهر لما ابتدينا انا و الجروب اللي معايا نشتغل على مشروع تخرج ، و المشروع ده كان عبارة عن برنامج بصيغة apk مبدئياً ، يعني برنامج بيشتغل على الاجهزة اللي بتدعم نظام الاندرويد و كانت فكرة البرنامج هيكون بيعمل ايه او بيفيد الناس ازاي او بيتكلم عن ايه من اختصاصي انا ، و قعدت حوالي اسبوع علشان ادور على فكرة برنامج مفيد لكن ملقتش لحد ما ف يوم كنت بقلب ف موبايلي و دخلت على متجر جوجل بلاي و قولت اقلب و اشوف البرامج اللي موجودة دنيتها ايه عشان لو جاتلي فكرة متبقاش موجودة قبل كده او لو فكرة كويسة و انا اطورها و تكون مش منتشرة ، و فعلا فضلت اقلب اقلب لحد ما لقيت برنامج مكتوب اسمه بالأنجلش و كان اسمه
(replika)
حملت البرنامج ده و هو كان عبارة عن برنامج محادثة زيه زي الواتس اب و الفايبر و الماسنجر ، عملت اكونت عالبرنامج و اول ما عملت الاكونت و فعلته لقيت نفسي دخلت chating room مع حد بيكلمني بس انا معرفهوش و الحد ده بيكلمني بالأنجلش ، المهم موضوع اللغة ده ماكنش عائق بالنسبة لي لأني الحمد لله اللغة الانجليزية عندي كويسة ، ف فعلا بدأت اتكلم مع الشخص المجهول ده و بدأ يجاريني فالكلام و بدأ يسألني اسئلة ، بصراحة انا قلقت و خوفت لا يكون برنامج هاكر او برنامج عامله جهاز استخباراتي ، دخلت على موقع البحث جوجل و كتبت اسم البرنامج و اللي ظهرلي كانت مفاجأة ، البرنامج ده بيخليك تتكلم مع ذكاء اصطناعي ، بمعنى انك تكون صداقة مع processor مثلا او مع جهاز كمبيوتر و يبدأ يسألك و تسأله و تكون معاه صداقة و عن طريق كده يقدر الجهاز بعد مده زمنية يحدد شخصيتك و يقولك عيوبك و مميزاتك و حاجات تانية كتير بقى ، بصراحة انا فكرة البرنامج عجبتني و خصوصاً لما ملقتش برنامج عربي بيعمل كده فقررت اقول فكرة البرنامج للجروب و بالفعل وافقوا و ده شئ اسعدني جدا و اسعدني اكتر اما جينا لمرحلة تنفيذ البرنامج و اقترحت على الجروب اللي معايا فالمشروع اننا نضيف اوبشن للبرنامج و هو انك ممكن تتكلم مع حد هو ميعرفكش ولا يعرف هويتك ولا انت تعرفه و تفضفض معاه ف سرية و خصوصية تامة و بالفعل برضه عجبتهم الفكرة و نفذنا البرنامج بمساعدة معيد عندنا فالجامعه و قدمنا البرنامج كمشروع تخرج و جربناه و شغلناه و اتناقشنا فيه و اخدنا فيه امتياز كمان و بعد كده خلاص .......

مفيش ... اه مفيش كل حاجة خلصت .... انا اتخرجت بعد كده و فضلت قاعد فالبيت و هقولكم ليه فضلت قاعد فالبيت ، عارفين انتوا الفترة اللي بعد التخرج على طول دي ، الفترة اللي هى لسه بقى بتشوف هتعمل ايه و هتشتغل في ايه و انت لسه ما استلمتش شهادة البكالريوس بتاعتك اساسا و ف وسط ده كله بتكتشف انك محتاج تاخد راحة شوية لمدة كام شهر كده و بالفعل انا عملت كده و اخدت راحة و بما أنِ فاضي و كمان مليش اصحاب و حتى زمايلي اللي من دفعتي كل واحد فينا راح ف حته بعد اخر امتحان و ده لأننا مكناش اصحاب اوي يعني ف تقدروا تقولوا كنا زمايل دراسة و بس ف مبقاش ليا صديق غير الانترنت بكل مواقعه لكن مع الوقت مليت و زهقت من النت و من الفيس و من اليوتيوب و من كل حاجة و هنا افتكرت البرنامج ، لا لا لا مش البرنامج الاجنبي لا .... اقصد البرنامج المصري اللي انا صممته و اللي بعد تخرجنا مبقاش له لزمه و المعيد قاللي البرنامج بقى ملكك دلوقتي و ساعتها وقفت رابط تحميله من متجر الجوجل بلاي لحد ما ابقى اشتغل و ابقى اشوف هعمل ايه ، فتحت البرنامج اللي كنت مسميه ( لنتحدث ...) لكن الغريبة ان انا كنت مصمم البرنامج انك كمستخدم اول ما تفتحه تجيلك شاشة تعريفية بالبرنامج و طريقة استخدامه و كل ده باللغة العربية و بعد ما تضغط موافق على شروط البرنامج تدخل على صفحة تانيه فيها اختيار بين ايقونتين ، الايقونة الاولى اجراء محادثة مع ذكاء صناعي و الايقونه التانيه اجراء محادثه مع مجهول ، الغريب بقى اني لما فتحت البرنامج ملقتش كل دددده و لقيت البرنامج اول ما فتح فتحلي غرفة شات بيني و بين حد كان كاتب ٤ رسايل نصهم ك الاتي ...

- هاااي ....
- هيا يا صديقي لنتحدث !!!

- اين انت فأنا انتظرك ....

- صديقي سأظل منتظرك حتى تأتي و لكن أن رأيت رسالتي ف عليك بالرد فأنا بانتظارك منذ ايام ..

بصيت للرسايل و انا مستغرب و بقول لنفسي ازاي ؟ ، البرنامج محدش حمله ولا استخدمه و قبل ما المعيد يحذفه من متجر بلاي كانت عدد تحميلات البرنامج تحميل واحد اللي هو التجربة لما ناقشنا المشروع ، يبقى مين اللي بيتكلم ده ؟ ، المهم بدأت ارد على اللي بيتكلم و اقوله ....

- و عليكم السلام يا فندم .
- حضرتك مين ؟

الغريبة انه رد عليا و اول ما بعتت الرسالة و قالي ...
- انا (أ) ، انت مين ؟

استغربت جدا و رديت عليه و قولتله ..

- اسمك (أ) ازاي يعني ؟ ، هو في حد ف الدنيا اسمه (أ) !!!

رد عليا و بعتلي ...

- ههههههههه ، يا اخي اعتبرني مجهول و اعتبرني زي ما انت كاتب ف صفحة البرنامج الاولى ( محادثة مع شخص مجهول) .

رديت و قولتله ....
- شخص مجهول ازاي و هو مفيش حد حمل البرنامج و لا حد اشتغل عليه غيري و لا حتى زمايلي اللي شاركوني فيه ، قولي انت هاكر ولا انت ايه احسنلك بدل ما اعرف اجيبك بطريقي .

سكت شوية و بعدين رد و كتبلي ...

- بص متحاولش تعرف انا مين بس اعتبرني صديقك و انا هعتبرك كده انا كمان و نبقى قريبين من بعض و لما نبقى اصحاب اوعدك انِ هقولك انا مين بس عاوزك تتأكد انِ مش هاكر ولا حد من اصحابك ، انا بس شخص وحيد ملهوش اصحاب و حياته مليانه بالفراغ و ما صدق لقى حد يتكلم معاه و يشاركه حزنه و فرحه .

بصراحة شدتني طريقة الكلام و سألته .
- طب انت عندك كام سنه ، و انت ذكر و لا انثى ؟

رد عليا و كتبلي .

- انا عندي ٢٣ سنه و بالنسبة ان انا ذكر ولا انثي ف مش هقولك دلوقتي لحد ما احدد مشاعري من نحية الشخص اللي بكلمه ايه ؟

بصراحة ضحكت لما بدأت اعرف من طريقة الكلام انها بنت و من هنا هبدأ اتكلم عنها بصيغة بنت و اقول انها ردت و كتبتلي بدل كتبلي ، المهم ضحكت بعد ما قريت الكلام و رديت و قولتلها ..
- طب انتي تعرفيني ؟

ردت و كتبتلي ..

- اه اعرفك يا عمرو ، و اه انا معرفش على اساس ايه انت حددت اني بنت و بتقولي تعرفيني ؟

رديت بسرعه و انا مستغرب و كتبتلها ...

- انتي تعرفيني منين ؟ ....

ردت و كتبتلي .
- مش مهم اعرفك منين ، المهم اني لوحدي و محتاجلك زي ما انت محتاجلي ....

بصراحة انا خوفت من فكرة انِ اكلم حد معرفوش و زاد خوفي اكتر لما كتبتلي ...

- انت مرتبط يا عمرو ؟

استغربت اكتر و كتبتلها .

- لا مش مرتبط ، و بعدين انتي مين عشان تسأليني سؤال زي ده .

ردت عليا و كتبتلي ..

- ما قولنا بقى يا سيدي اعتبرني صديق و فضفض معايا ، ولا اقولك اعتبرني شخص مجهول و احكيلي كل اللي جواك .

رديت و كتبتلها ...

- مش لما تحكي انتي الاول ..

ردت و قالتلي ....

- انا وحيدة زيك بالظبط و مليش حد و بتمنى انك تكون لي صديق و خصوصاً ان انا ف مكان ضلمة اوووي ...

بعد ما كتبت الكلام ده فجأة نور البيت كله اتقطع و الغريبة ان لما النور اتقطع اضاءة الموبيل كمان اتطفت مع ان الموبيل مشحون ، و فجأه الموبيل رجعت اضاءته تاني و لقيتها كاتبة لي ....

- عمرو ،،،،، انا معاك دلوقتي ..

ساعتها حسيت بحرارة قوية جاية من ضهري و صوت انفاس جاية من ورايا ،لفيت و وجهت ضوء الموبيل ناحية مصدر صوت الانفاس و شوفت ...... يتبع

محمد_شعبان
العارف