دوامة عشق 💜الحلقة 23💜 - اليك القصة
دوامة عشق 💜الحلقة 23💜 - اليك القصة
الحلقة الثالثة والعشرون
نظرت (رحمة) إلى (نورهان) التى تقف ثابتة بلا حركة وهى تقول
-مالك يا بت بلمتى كده ليه ؟!!
نظرت إلى الساعة وجدتها الحادية عشر صباحا فقالت
-معلش يا (رحمة) انا لازم امشى حالا
لم تنتظر اجابة (رحمة) واسرعت نحو خارج الجامعة بينما نظرت لها (رحمة) وهى لا تفهم ما الذى يحدث معها ٠٠
كانت (نورهان) تحاول الأتصال ب (أكمل) طوال الطريق ولكن دون جدوى فلم يكن يجيب عليها فإخذت سيارة اجرة لتتوجه إلى مكتبه وكانت تحاول الأتصال به طوال الطريق ولكنه لم يجب عليها وما إن وصلت حتى ترجلت من سيارة الأجرة واتجهت نحو داخل شركته الخاصة وهى تشعر بالخوف حتى انها كانت تبكى دون إن تشعر ٠٠
استقلت المصعد وسألت احدهم عن مكتب (اكمل النصار) وما إن وصلت إلى مكتبه اتجهت نحو المكتب مسرعة لتفتح باب مكتبه فتفاجئت السكرتيرة الخاصة ب (أكمل) بذلك واسرعت نحوها وهى تقول
-يا انسة ٠٠ انتى بتعملى ايه كده ؟! مينفعش كده
كانت (نورهان) قد دخلت إلى الداخل ووجدت (أكمل) لديه اجتماع فنظر (أكمل) لتلك الأصوات التى بجواره عندما وجد (نورهان) وهى بتلك الحالة عيناها ممتلئة بالدموع حتى وقف عن مقعده تاركا الأجتماع واقترب منها وهو يقول
-مالك يا (نورهان) ؟
قالت السكرتيرة الخاصة به
-يا فندم دى دخلت فجاءة ومعرفتش ام٠٠
قاطعها (أكمل) قائلا
-ع مكتبك يا (نجوى)
ثم نظر إلى من كانوا معه فى الاجتماع
-الاجتماع انتهى
انصرف الجميع وظلت (نورهان) مع (أكمل) فى مكتبه وحدها وهى تبكى بخوف فنظر لها (أكمل)
-ارجوكى اتكلمى مش قادر حقيقى اشوفك بالشكل ده ابداا
ابتلعت (نورهان) ريقها
-ج٠٠ جالى تليفون يا (أكمل) ٠٠ واحد بيقولى حياة (خالد) هتروح وانا السبب مش هسامح نفسى لو (خالد) مات ٠٠ انت فاهم ٠٠ انا
قال (أكمل) مطمئنا إياها
-اهدى متخافيش ٠٠ انا معاكى ومش هسيبك فهمينى بالراحة
-انا اعصابى تعبانة ٠٠ ارجوك ركز معايا ٠٠ (خالد) هيموت كده بيقول فرامل عربيته بايظة لو ركب العربية هيموت ٠٠ بيقول انا السبب و ٠٠ انا خايفة خايفة يا (أكمل)
كانت (نورهان) لا تشعر بما تفعله او تقوله فتحدث (أكمل) مطمئنا إياها
-خليكى هنا مرتاحة واهدى خالص ٠٠ انا هشوف الموضوع ده وهطمنك بإذن الله مفيش حاجة انا رايح ل (خالد) ارتاحى انتى هنا ٠٠
هزت (نورهان) رأسها بالإيجاب وهى تشعر بالخوف نظر لها (أكمل) وهو يشعر بالحزن على حالها ولكنه قرر ان يذهب ليطمئن على (خالد) ويطمئن (نورهان) ٠٠
******************
استقل (أكمل) سيارته حاول الأتصال بمكتب (خالد) فى المخفر اتاه صوت عسكرى وهو يجيب
-الو
-(خالد) معايا
-لا ٠٠ الباشا لسه نازل كان تعبان واستأذن و ٠٠
قاطعه (أكمل) قائلا
-نزل بعربيته ؟
-ايوة يا باشا
اتك (أكمل) على شفتاه بغضب ثم اغلق الهاتف واتصل بهاتف (خالد) اكثر من مرة ليجيب حتى اجاب اخيرا (خالد) فقال (أكمل)
-انت فين يا (خالد) ؟
-انا مروح فى حاجة
قال (أكمل) بنفاذ صبر
-انا مروح و ٠٠
قاطعه (أكمل) بصرامة وهو يقول
-بقولك ايه متحاولش توقف العربية اطلاقا اختار الطرق السلكة واطلع على طريق (٠٠٠٠)
-بس ليه مش فاهم
-عربيتك مفيهاش فرامل اسمع اللى بقولك عليه
ابتلع (خالد) ريقه ثم قال
-بس ٠٠
-قولتلك اختار الطرق السالكة وحصلنى ع هناك
فتحدث (خالد) قائلا
-انا ممكن اتصرف و ٠٠
قاطعه (أكمل) قائلا
-عارف بس ده مش وقت نجرب فيه اسمع كلامى خليك معايا ع الخط لحد ما نوصل
وماهى الا ربع ساعة حتى وصل (أكمل) إلى طريق جانبى به شجرة توقف بسيارته امامها حتى لمح سيارة (خالد) من مراءة سيارته اتية خلفه فتحدث ع الهاتف قائلا
-انا هطلع انا قدام وانت وقف العربية عند الشجرة
-بس ٠٠
-مفيش وقت انجز
تحرك (أكمل) بسيارته حتى تصطدم سيارة (خالد) بتلك الشجرة وما ان ابتعد (أكمل) حتى اوقف سيارته وترجل منها متجها نحو (خالد) حاول اخراجه من السيارة قبل ان تنفجر فتح باب السيارة مسرعا كان (خالد) فاقد للوعى فى الداخل وما إن اخراجه حتى حمله على احدى اكتفاه واسرع به بعيد قبل إن تنفجر السيارة ٠٠
وما إن اقتربوا من سيارة (أكمل) فكانت سيارة (خالد) قد انفجرت واشتعلت بالنيران ادخله (أكمل) سيارته ثم توجه لمقعد القيادة وقاد سيارته نحو مشفى ما ليطمئن على حالته ٠٠
****************
جلست (نورهان) فى مكتب (أكمل) وهى تشعر بالخوف والقلق وتبكى بشدة تريد الأتصال للأطمئنان ع (خالد) و (أكمل) وتنظر للهاتف بين الحين والأخر بقلق ولكنها قررت ان تنتظر اتصال (أكمل) حتى لا تزعجهم او تسبب لهم مشكلة بمكالمتها تلك ٠٠
***************
عاد (منير) من عمله وما إن رأته (سچى) من شرفة غرفتها حتى قررت ان تنتظر صعوده كى تتحدث معه فقد قررت ان توضع حد لسوء الفهم الحادث بينهم فخرجت من غرفتها انتظرته وجدته يتجه إلى غرفته غير عابئا او ناظرا لها حتى شعرت بالضيق وتوجهت لتقف امامه قائلة
-فى حاجة اسمها اسمع الطرف التانى ٠٠ مسمعتش عنها دى ؟
تحدث (منير) بضيق
-انا مش فايق يا (سچى) وجاى تعبان فإرجوكى مش عاوز اتكلم
-ماهو انت فاهم غلط ٠٠ ارجوك اسمعنى
زفر (منير) بضيق ثم قال
-عاوزنى افهم ايه يا ست (سچى) يا مؤدبة ٠٠ بتكلمى (عمر) ليه ؟! انا مش مالى عينك يعنى هتفهمينى ايه ولا هتجينى مبرر للخيانة
نظرت له (سچى) بلوم كبير وهى تردد
-خيانة !! ٠٠ عموما اسمع وبعدين اعمل اللى انت عاوزه ٠٠ انا و (عمر) مش بنحب بعض خالص بالعكس (عمر) بيحب بنت تانية وانا عارفة ده وهو عارف بحبى ليك بل ع العكس كان بيساعدنى عشان انت تغير وتحس ع دمك بس انت كنت جبلة ومبتحسش
اضيقت عينان (منير) بعدم فهم وهو يقول
-ايه اللى بتقوليه ده يا (سچى) ٠٠ انتى عاوزنى اصدق الهبل ده
تحدثت بنبرة صادقة
-والله ده اللى حصل وممكن تسأل (عمر)
مسك (منير) ذراع (سچى) بقوة قائلا
-وانتى ازاى يا هانم تتخطبى لواحد اتفاق انتى فاكرة الخطوبة لعبة ٠٠ لااا ده انتى محتاجة تربية من اول وجديد بقى
شعرت (سچى) بالألم فى ذراعها وهى تقول
-خلعت ايدى ٠٠ ابعد كده
ازاحت يده قليلا ثم قالت وهى تدلك يدها
-مش كده انا لما اتخطبت ل (عمر) كان بجد مكنتش بلعب خالص ٠٠ بس لما العلاقة بينا كانت فاترة وباردة كل واحد فينا صارح التانى ودى كانت فكرتى انا اغيظ (يمنى) حبيبته وهو يغيظك هو كان معترض بس انا اللى اقنعته وقلتلوا مش هنخسر حاجة
نظر لها (منير) مطولا ثم قال
-حد يعمل عملتك دى يا هانم ٠٠ ازاى تفكرى كده
-ماهو جاب نتيجة اهو ٠٠ وكنت بنفذ كلام (عمر) قالى طنشيه خالص هو طول ماهو حاسس بحبك مش هينتبه ليكى ولما طنشتك جيت ع ملا وشك
ظهر على وجه (منير) شبح ابتسامة خافتة ولكنه اتقن اخفائها تماما ثم قال
-برده الخطوبة والحب مهماش لعبة يا هانم ومينفعش تدلعى ع راجل كده وانتى عارفة ان مفيش بينكوا حاجة كل ده غلط ٠٠
نظرت له بإستنكار قائلة
-يا سلاااام مانت بتعمل اكتر من كده وبتنام مع بنات ولا فاكرنى مش عارفة وهتتربى انا هربيك مش هخليك تشوف بنت تانية خالص لأنك لو عملتها اولا حرام ثانيا هتبقى خاين
ارتبك (منير) قليلا ثم قال
-انا راجل يا (سچى) لكن انتى بنت مينفعش تعملى كده وتتفقى مع واحد حتى عشان تخلينى اغير طب قدر هو زبالة واستغل الوضع وعمل حاجة مش لطيفة كان هيبقى وضعك دلوقتى
قالت (سچى) وهى تنظر لأسفل
-معاك حق بس (عمر) كويس ومحترم
-تمام ٠٠ محترم لنفسه وبعدين هو راجل ممكن يضعف فى اى وقت صدقينى مش هيهمه اللى قدامه حبيبته ولا لأ
شعرت (سچى) بالضيق من نفسها ثم قالت
-خلاص بقى يا مونى مش هعمل كده تانى ٠٠ انت مش هتسبنى اعمل كده تانى صح ؟
ابتسم (منير) قليلا ثم قال
-ده انا ادبحك واشرب من دمك ٠٠ فاااهمة ؟!
-وانت ؟! ٠٠ انت مش ناوى يتصلح حالك و تبطل
نظر لها بهيام قائلا
-ابطل ايه ؟
-تنام مع بنات وتعمل القرف ده
ابتسم (منير) بسعادة ثم قال
-اقولك ع سر يا (سچى) بس متقوليش لحد خالص
هزت رأسها بالإيجاب فتابع (منير)
-انا عمرى ما نمت مع بنات
اتسعت عينان (سچى) غير مصدقة وهى تقول
-انت بتقول ايه ؟ ٠٠ ازاى يعنى ؟ ّلا مستحيل انت بتكدب ٠٠ انت بتكلم جد
انفجر ضاحكا على رد فعلها قائلا
-اه والله
نظرت له وهى لا تفهم
-اومال ؟
-اه اعرف بنات وهما اللى بيعزمونى عندهم فى البيت بس انا برفض والله ٠٠ اينعم بشرب مش هنكر بس عمرى ما عملت اكتر من كده
ابتسمت (سچى) بسعادة
-انا مبسوطة ومش مبسوطة فى نفس الوقت ٠٠ عارف الاحساس ده
-ازاى يعنى ؟
-مبسوطة وسعيدة جداا انك معملتش اللى يغضب ربنا من ناحية البنات بس انت بتغضبه برده بالشرب ده
هز (منير) رأسه ثم قال
-هحاول ابطل ٠٠ متقلقيش
ابتسمت (سچى) بسعادة فقال لها بصرامة
-يلا ع اوضتك
زمت شفتاها قائلة
-حاضر ٠٠
*****************
خرج الطبيب من الغرفة فإقترب نحوه (أكمل) قائلا
-خير يا دكتور ٠٠ (خالد) بخير ؟
هز الطبيب رأسه بالإيجاب قائلا
-متقلقش الحمد هو بخير الجروح كانت بسيطة وبعدين هو جسمه كويس واستحمل
ردد (أكمل) بصوت منخفض
-الحمد لله
فتابع الطبيب قائلا
-عموما هو ساعة كده ويفوق وتقدر تتكلم معاه
-تمام شكرا ليك اووى يا دكتور ٠٠
انصرف الطبيب فإخرج (أكمل) هاتفه ثم قام بالإتصال ب (نورهان) التى ما إن رأت رقم هاتفه حتى اجابت ع الفور
-ايوة يا (أكمل) ٠٠ خير حصل ايه طمنى ارجوك
قال (أكمل) مطمئنا إياها
-اهدى يا حبيبتى ٠٠ متخافيش كل شئ تمام و (خالد) بخير وعايش و ٠٠
قاطعته قائلة
-انت بتكلم جد ولا بتقول كده عشان تطمنى وخلاص ؟
-والله بتكلم جد ٠٠ انا هاجى اخدك دلوقتى عشان تطمنى عليه بنفسك
-بجد يا (أكمل) ؟!
ابتسم (أكمل) قائلا
-بجد يا ايه ؟
تحدثت (نورهان) بجدية
-ارجوك ده مش وقته ٠٠
- طب خلاص خلاص انا جاى اخدك اهو وهتشوفى بنفسك ٠٠
*****************
قامت (يمنى) بإمساك هاتفها ثم قامت بفتحه وما إن فتح حتى تلقت رسالة (عمر) كان محتواها فقط
(انا بخير)
ظلت تنظر للرسالة وهى لا تعرف لما تشعر بذلك الحزن ثم حدثت نفسها قائلة
-انا بخير ٠٠ لا كتر خيرك بصراحة ٠٠ بااارد طول عمره كشرى وبارد
صمتت (يمنى) قليلا ثم قالت
-طب ٠٠ طب وانتى عاوزة منه ايه يا (يمنى) ٠٠ سبيه فى حاله المفروض متتكلميش معاه اصلا ٠٠ هو اللى عمله صح هيرد يقولى ايه يعنى ؟ ٠٠ ايه اخبارك وحشانى ٠٠ بس هبل بقى يا (يمنى) ٠٠ انتى هبلة جدا
******************
وصل (أكمل) إلى مكتبه وجد (نورهان) جالسة فيه منزوية على الأريكة وهى تبكى بشدة فإقترب منها وهو يقول
-مبحبش اشوفك كده ٠٠ والله (خالد) زى الفل وتقدرى تقومى تشوفيه معايا
نظرت له بشك قائلة
-انت بتكدب عليا صح
اقترب (أكمل) منها بضع خطوات ثم ثنى ركبتيه ليجلس القرفصاء وهو ينظر لها
-معقول هكدب عليكى يا (نورهان) ما لو حصل حاجة هتعرفى ٠٠ انا جاى اخدك المستشفى مش عاوزك تخافى بجد
ابتلعت ريقها وهى تمسح دموعها ثم نظرت له وهى تقول
-طب اوعى كده ٠٠ خلينى اقوم
ابتسم (أكمل) قليلا ووقف جانبا ثم قال
-اهو وعيت خالص
وقفت (نورهان) ثم قالت
-ودينى المستشفى
-حاضر
******************
وصلت (نورهان) إلى المشفى مع (أكمل) وكانت تبكى بشدة حتى قابلت الطبيب يخرج من غرفته فإوقفته وهى تقول
-هو ٠٠ هو يا دكتور (خالد) كويس
ابتسم الطبيب قليلا ثم قال
-متقلقيش يا مدام مفيش داعى لكل العياط ده جوزك كويس
جز (أكمل) على اسنانه ثم قال مكررا بإستنكار بصوت خافت
-مدام !!
ثم نظر للطبيب وقال
-دى مش مدام دى خطيبتى انا ٠٠
ارتبك الطبيب قائلا
-ا٠٠ اسف يا فندم ٠٠ مكنتش اعرف عموما هو كويس وكمان شوية تقدروا تتكلموا معاه ٠٠ عن اذنكوا
انصرف الطبيب بعيدا فمسحت (نورهان) دموعها فنظر لها (أكمل) غاضبا
-يعنى ينفع كده ؟! بتعيطى كده ليه اهو افتكر انه يهمك انا مش فاهم عاملة فى نفسك كده ليه ؟!
هزت (نورهان) كتفاها بلا مبالاة ثم قالت
-وانا مالى هو افتكر ايه ؟ ٠٠ وبعدين انت شايف ان مينفعش اعصابى تبوظ اللى اتصل بيا قالى دمه فى رقبتى
فتحدث (أكمل) بقليل من الضيق قائلا
-مانتى اللى اديتي الدكتور الايحاء ده ٠٠
شعرت (نورهان) بضيقه الشديد واهتمامه الزائد بها فهو قد الغى عمله واجتماعه من اجل ان يساعدها نظرت له وهى تقول
-طب خلاص اسفة ٠٠ حقك عليا
ابتسم (أكمل) ثم قال
-لا مسمعش منك اسفة تانى حتى لو ليا
ابتسمت (نورهان) قليلا ثم قالت
-انا مش عارفة انت لو مكنتش ساعدتنى كنت هعمل ايه ؟! ٠٠ كنت هفضل كده حاسة ان دمه فى رقبتى ومش قادرة افهم ليه ؟ ٠٠ عشان انا بلغت البوليس يعنى انا معملتش حاجة تانية يا (أكمل) وانت اللى بلغت كمان ولا ٠٠ ولا ممكن يكون (خالد) هو الظابط اللى مشترك فى الجريمة وحبوا يخلصوا منه
نظر لها (أكمل) ثم قال
-ايه اللى بتقوليه ده ٠٠ معتقدش ٠٠ انتى حكيتى لمين غيرى ؟
هزت (نورهان) كتفاها بلا مبالاة ثم قالت
-مش لحد مهم
نظر لها (أكمل) مطولا ثم قال
-قلتى لمين يا نورا
ابتلعت (نورهان) ريقها ثم قالت
-حكيت ل (رحمة) صاحبتى من يومين و ٠٠
نظر لها (أكمل) بشك قائلا ليشجعها على الحديث
-ايوة ٠٠ ومين تانى ؟
تلعثمت (نورهان) قائلة
-و ٠٠ و ٠٠ و (يوسف)
اشتدت نظرات (أكمل) الغاضبة لها بينما هى توترت ونظرت لأسفل وهى تشعر بالخوف ٠٠
دوامة_عشق
علا_السعدني
لا توجد تعليقات حتى الآن "دوامة عشق 💜الحلقة 23💜 - اليك القصة"
إرسال تعليق
ملاحظة للجميع