الضباط 6 - اليك القصة

الضباط 6 - اليك القصة

الظباط_6 الجزء_الاول
ـ اتحركوا بسرعه علي الدور السادس
كتيبه عساكر وظباط في حي الزهور قدام عماره قديمه شويه او تحسها مهجورة
= في ايه يباشا !!
- جالنا بلاغ بوجود جماعه ارهابيه في شقه في الدور السادس
= الدور السادس !! يا بيه انا ساكن في العماره هنا بقالي 25 سنه والدور السادس مفهوش سكان من ساعه ما اتقتل عم رجب فيه من 7 سنين
ملتفتش للراجل وطلعت مع كتيبتي للدور السادس بكل سرعه ، انا الرائد / هادي رفعت ابو المكارم ، قسم عمليات خاصه .. دخلنا الشقه بعد ما فتحنا الباب اللي كان موارب ، اشبه بصحراء مفيش اي اثاث ، المكان مغطيه التراب وعشش العناكب بشكل كامل ، معدا جزء علي الحيطه ، جزء مكتوب عليه 
" احترس ، ستموت الآن " جمله غريبه وشكلها مكتوبه قريب علي عكس باقي الشقه
- مفيش حاجه في الشقه يا فندم
= اتحركوا علي تح....
قبل تكمله جملتي كان باب الشقه اتقفل بقوة ، ضحكات عاليه ، كلمات بتظهر علي الحيطه " من قتل يقتل "
بدأ سحب العساكر وقتلهم بطريقه غريبه من غير وجود حد بيسحبهم ، ضرب نار مجهول المصدر بيصيب بعض العساكر ، نار شديده بتمسك في اللي موجودين ، صوت الضحك بيزيد اكتر واكتر ، الملجأ الوحيد لمعظم العساكر كان النط من البلكونه ، بدأ يهدأ الصوت تدريجيا لحد ما اختفي خالص ...
بصيت حواليا ملقتش غير نفسي ، كتيبتي المسئول عنها ماتوا قصاد عنيا بطريقه غريبه من غير ما افهم ، باب الشقه اتفتح ببطء ، ظهرتلي جمله "اهرب ، دورك قادم" ، من غير تفكير لقيت نفسي علي السلالم باقصي سرعتي لحد ما خبطت في نفس الراجل اللي قبلته وانا طالع
- مش قولتلك مفيش حد فوق انت اللي مسمعتش كلامي
مفكرتش اقف وانا بتصبب بالعرق والخوف مسيطر عليا من كل ناحيه ، ملفتش نظري غير جمله قالها الراجل وانا نازل بجري باقصي سرعتي ، قالي :
- محدش بيخش الشقه وبيطلع عايش ، الدور عليك ..
وصلت لشقتي والرعب مالي قلبي ، مفكرتش انام عنيا حرفيا مش قادره تغمض ، فتحت اللاب قدامي مع كوبايه شاي ودورت علي حادثه عم رجب في العماره ، مجموعه من 6 ظباط كسروا باب الشقه ودخلوا قبضوا علي بنته اللي كانت موجوده علشان ابوها يطلع ، مجرد ما سمع ان بنته معاهم رجع بعد ما كان قدر يعدي من الشباك للعماره المجاوره ، جه عم رجب وسلم نفسه بس الظباط كانوا منزوعين من كل معاني الرحمه والانسانيه ، احد الظباط طلع سكينه ودبح البنت ووقعت وعين عم رجب بتقع معاها ، قبل ما الدمعه تنزل من عينه كان اخد رصاصه في دماغه وراح مع بنته علشان متروحش لوحدها ، الغريب أن كل ضابط من الظباط بعد الحادثة ب 4 ايام لقوه مدبوح في بيته بنفس الطريقة اللي ادبحت بيها البنت وعلي جبين كل واحد علامه محفوره مش معروف اصلها ولا معناها ، معدا واحد اختفي مرجعش بيته من الحادثه ومحدش يعرف عنه حاجه ...
محستش بنفسي غير تاني يوم ، نمت نوم عميق مختلط بكوابيس عن الكتيبه ، بنت عم رجب ، الظباط ال6 ..
اتحركت علي العماره علشان الاقي اي خيط افهم منه اللي حصل لرجالتي ، الراجل اللي قبلته علي السلم ، اكيد هلاقي عنده معلومه تفهمني او حتي افهم الجمله اللي قالهالي وانا نازل بجري ، وصلت هناك وسألت لحد ما قدرت اوصله ..
- انا عاوز اعرف ليه حصلي كده انا ورجالتي !؟ وايه معني الجمله اللي قولتهالي علي السلم !؟
= الشقه من ساعه حادثه عم رجب وبنته واللي بيخشها مش بيطلع منها ، غريب انك لسا عايش وانهم سابوك تطلع ، يمكن عاوزين منك حاجه
- حاجه ايه !! انا مش هنفذ حاجه ، انا عاوز اجيب حق رجالتي اللي ماتوا قصاد عيني
= ناقص واحد ، انت اللي هتوصلهم للواحد
- واحد مين انا معرفش حد ومعرفش مين ده
= تعرفه ، الظابط الناقص هو " رفعت ابو المكارم "
" يتبع " ,,,,.
................... ..............................................................

الظباط_6  الجزء_الثاني
سبب اختفاء ابويا بقا واضح ليا دلوقتي ، عرفت انه مماتش وانه هرب بعد الحادثه من 7 سنين ، عرفت سبب عصيبته في اخر مره رجع البيت فيها ، عرفت السبب في انه سابني وحيد ..
بعد 3 شهور ..
محاولاتي مرحتش علي الفاضي ، قدرت اوصل لمكانه وعرفت مختفي فين كل ده ، كلمته في التليفون
- الو ، مين معايا
= اكيد مش هتعرف صوتي ، دول 7 سنين برضو يا بابا
- هادي !! انت عرفت اني لسا عايش
= ايوه عرفت يا بابا ، مكنش هينفع افضل اكتر من كده معرفش ، انت وحشتني اوي وعايز اشوفك واعرفك علي مراتي وعيالي
- وانا مقدرش اتاخر عليك يبني ، هنتقابل فين ؟
اتفقت معاه ورايحله دلوقتي ، رايح وذكريات عمري اللي قضيتها معاه بتمر قدام عيني ، رايح ومش ناسي انه ساب امي واختفي ومعرفناش حاجه عنه ..
- واحشني يبني ، واحشني اوي
= وانت كمان يا بابا ، هتيجي معايا بقا علشان تشوف عيالي ومراتي
بعد مسافه طويله وحكاوي طول السكه وقصص ملهاش اساس من الصحه عن سبب اختفاءه الفتره اللي فاتت بيحاول يضحك عليا بيها
- احنا ايه اللي جبنا هنا يبني
= انا ساكن هنا ، يلا بينا مش بعيد ده الدور السادس
- السادس !! طيب يبني يلا بينا
فتحت باب الشقه ببطء اللي كان موارب كالعادة ، كل اللي كان في الشقه اختفي ومفيش اثار لأي حاجه وكأن حد دخل نضف الشقه بالكامل ..
= انا كده نفذت اتفاقي وجبته لحد هنا ، الباقي عليكوا
- انت بتكلم مين يبني !! واتفاق ايه
= الاتفاق ان الدايره تكتمل وكان انت اللي ناقص ، طبعا فاكر اللي حصل هنا من 7 سنين ، وديه حاجه تتنسي برضو ، الحق هيرجع ولو علي حساب مين وعلي الاقل علشان اللعنه تنتهي
- لعن.. لعنه ايه يبني ، انا مش فااه....
باب الشقه اتقفل بكل قوة ، دم بدأ ينزف علي الجدران بشكل مخيف ، دايره ناار حوالين رجلينا ، دخان غريب ملئ المكان وبكميات ضخمه ادي الي فقداني الوعي انا وابويا ..
* انت نفذت المطلوب منك بكل دقه
- انت !! مش انت اللي قولتلي ان ابويا هو الظابط السادس ، وان اي حد بيخش الشقه مش بيطلع منها عايش وهما سابوني اطلع علشان انفذ اللي عايزنه واجبلهم اخر حد اشترك في الجريمه
* وانت صدقت وعملت اللي عليك وزياده ، ابوك كان الشاهد الوحيد علي الجريمه ، هو اللي حاول يوقف الظباط ال6 لكن مقدرش ، قتل واحد من الظباط بطعنه في جنبه وواحد بطلقه في صدره وهرب بعد ما اقدرش ينقذ البنت وابوها ، اختفاءه كان في مصلحتنا بس لسا عارف السر وكان لازم يدفن معاه
- مصلحتنا !! انتوا مين
* اه نسيت اقولك ، انا الظابط السادس ...
النهاية
ل_حاتم_عشري