قصة رقم 7 - اليك القصة

قصة رقم 7 - اليك القصة

- برضو مش هتقولي قتلتها ليه ..؟! 

- أنا مقتلتهاش ... مستحيل اقتلها ، ده .. ده انا كنت بحبها !!

 - دي سابع مرة اسألك السؤال ده وتجاوبني بنفس الإجابة وده مش في صالحك الأدلة كلها ض.. 

- سبعة ..مم سبعة ،  تعرف إن الرقم ده مميز جداً .. 

- متغيرش الم..

-  الضوء الأبيض بيتحلل لسبع ألوان ؟! ، عجايب الدنيا سبعة !! ، سبع سماوات .. سبع أراضين . 

- عصام  أنت كده بتتهرب من .. 

- القارات برضو عددها سبعة ، غريبة ، ده في برضو سبع بحار !! ، عندك علم إن المعادن الأساسية الي في الأرض سبعة ؟! .. الإلكترون الصغير ده .. الي بيلف حوالين نواة الذرة ، عنده سبع مستويات مدارية برضو . 

- عصام .. !! 

- طب أنت تعرف إن الخطايا .. مش هتصدق ، عددها برضو سبعة ،"الغرور" ،"لجشع" ،"الشهوة" ،"الحسد" ،"الشراهة" ،

"الغضب" ، "الملل"...  ، خليني احكيلك حكاية .. 

" واحنا صغيرين دايما بيبقى في بنت ، الفصل كلها بيحبها ، ايوه .. الي بتبقى قاعدة في الصف الأول ، دايما بتبقى جميلة ، وبتطلع من الأوائل ، الفصل كله بيحاول يكلمها بس هى بتبقى معجبة بواحد بس ، ايوه .. نفس الولد الي في الدسك الي جنبها في نفس الصف ، وعادة بيطلع الأول على الفصل ... 

بس هو على عكس الفصل كله مش مديها اي اهتمام مع إنه عارف وسعيد ب ده ، لإن صابته لعنة الخطيئة الأولى " الغرور " ، الفصل كله بيستسلم ويعلن إنهزامه ، ماعدا واحد ، بيفضل يراقبها من بعيد ، رافض فكرة الإستسلام لإنه بيحبها فعلاً ، التلاتة بدأوا يكبروا ، هى بتحاول تقرب للمغرور وهو مستمتع بده وسعيد بتعذيبها لإنه مريض ، والي بيراقبها من بعيد فضل يراقب بدون ما ياخد اي خطوة ..

 لحد ما القدر جمعهم ، قربوا من بعض وفعلاً حبته واتخطبوا ، المغرور اتضايق .. احلوت في عينيه فجأة ، ازاي إنتباهها راح لشخص غيره ، شخص مش في عبقريته ولا مثاليته ، وطبعا لإنه يمتلك أعظم خطيئتين وهم " الجشع والشراهة " ، عايز كل حاجة ليه ، حاول يقربلها ، بس هى كانت رافضة ، أنت عارف طبعاً ، القلب يحمل في جعبته شخص واحد فقط ،  استخدم كل الطرق عشان يدمر العلاقة كان "بيحسده"  ويحقد عليه ، " شهوته " للنجاح الدايم بتلح عليه .. لكنه فشل ، كان أول مره يفشل في حياته ..

 حس ب"الملل" إنه يدمر العلاقة بالطرق التقليدية ، العلاقة كانت ناجحة لدرجة أنهم اتجوزوا، سمع الخبر .. لعنة الخطيئة الأخيرة صابته " الغضب " ، استغل غياب الزوج عن البيت ، راح البيت بكل هدوء ، اول ما شافته بدأت تزعق فيه ، كتم أنفاسها ، مسك السكينة الي مخبيها وبدأ يطعنها ، لحد ما التقطت أنفاسها الأخيرة ، وبحكم شغله قدر يمسح الأدلة ويلفقها لزوجها بكل ذكاء ، بس هو مخدش باله من حاجة ،  بس الزوج اخد باله ،الزوجة قبل ما تموت ، رسمت رقم على الأرض كان رقم "٧" ..

 لو رجعنا للفصل مرة تانية وعدينا الطلاب من ناحية باب الفصل ، واحد .. اتنين .. تلاتة .. ايوه أنت كنت الطالب رقم سبعة يا حضرة الظابط .. 

- أنت بتقول ايه يا مجنون أنت .. ؟! 

- ايوه .. طول عمرك كنت فاكر نفسك اذكى واحد ، أفضل واحد ، مفيش زيك اتنين ، بس انا مكنش هاممني كل ده ، أنا  كان هاممني هى ، جرحتها مرة وأنا قدرت أنسيها ، قدرت أرجعها مرة تانية ، البنت الجميلة ، الي الضحكة مبتفارقش وشها ، بس أنت كنت عامل زي اللعنة ، وبعد ما كل محاولاتك باءت بالفشل استخدمت أقذر محاولة لتدمير حياة شخص ، ومبروك أنت نجحت فعلاً .. 

- ايه .. ايه الي أنت ببب.. بتقوله ده أأ ..أنا .. 

- بس تعرف أنا بفضل رقم ٨ عن ٧ ، تحسه رومانسي اكتر ، عشان كده ضفت خطيئة جديدة ، اه هى ممكن نصنفها كإشتقاش من الغضب بس هى فريدة من نوعها شوية .. اسمها " الإنتقام " .. ، ايه ده ، اتفضل منديل في دم نازل من مناخيرك .. 

- ايه ده ..ايه الدم ده ، دماغي م .. أنت .. أنت عملت ايه ؟! 

- مفيش يا سيدي كان في فار مدوخنا في البيت بقاله فترة ولحسن حظك كنت جايبله النهاردة سم مستورد عشان نتخلص منه ، عرفت اخبيه كويس قبل ما يجبوني هنا وقدرت اضيفلك شوية في كوباية الشاي بتاعتك .. 

- انت .. أنت .. 

- كان نفسي اكمل الحديث معاك بس للأسف تقريبا بسبب الفترة الكبيرة الي قعدناها في التحقيق ومن منظر حنفية الدم الي نازلة من مناخيرك إن مادة الوارفين الموجودة في السم، والي وقفت عمل بروتين البروثرومبين المسؤول عن تجلّط الدم في أوعيتك الدموية إن حصلك نزيف داخلي ، وتقريبا وصلنا لمرحلة إننا مش هنقدر نسيطر عليه ..للأسف .

.

..

*تمت*

أتمنى تكون القصة عجبتكم، 

>

مجموعة تفسير الرؤى والأحلام على فيسبوك

قصة رقم 7 - اليك القصة