ملاكي الحارس 🙂 الجزء 12 - اليك القصة

ملاكي الحارس 🙂 الجزء 12 - اليك القصة

ملاكي_الحارس
الجزء_الثاني_عشر
لا وقت لديك لتغرق في حزنك ،الحياة إن وجدتك ضعيفاً ستسحقكك ،لن ترحمك صدقني ، وقت الأزمات صنع لتعرف معادن الناس .
ريهام : بقولك ملك ماتت ،انتقلت
هاجر : بتقولي ايه ،انتي عرفتي ازاي
ريهام :انا كنت هناك بالصدفة وعرفت
هاجر : صدفة أيه يا ريهام ، اللي ودتك هناك بصي تعالي حالا نشوف المصيبة دي
ريهام: انا كلمتك عشان أسألك عن مراد
هاجر وكأنها تذكرت ما حدث : مراد راحلها يا ريهام
ريهام : انتي فين انا جاية
هاجر : تعالي علي الفندق لازم اشوف مراد
ركضت هاجر مسرعة نحو الفندق لتبحث عن مراد وناقوس الخطر يدق في صدرها ، وصلت إلي حجرته وجدتها مفتوحة ،دخلت لتجد مراد يجلس علي الأرض ملابسه غارقة بالدماء يضع وجهه بين كفيه ويبدو غارقا في حالة يأس شديدة ، ركضت نحوه وجلست أمامه لتجده يميل عليها ويحتضنها بقوة ويبكي كطفل صغير
هاجر : أهدي عشان خاطري ،واحكيلي حصل أيه
مراد : مقتلتهاش يا هاجر والله ما قتلتها، أنا لما روحت كانت ماتت حاولت افوقها بس خلاص كانت انتهت
هاجر : أهدي أنا متأكده انك برئ
في دخول ريهام : متأكدة ازاي ده هدومه غرقانة دم وراجع من عندها
هاجر : انتي بتقولي ايه
ريهام: لازم نبقي واقعيين عشان نعرف نعالج المشكلة دي ،والكدب مش في صالحنا ياهاجر
هاجر بغضب : انتي كمان راجعه من عندها يبقي انتي كمان متهمة
ريهام : طب تفسري انهياره ده بأيه
هاجر : مراد عنده فوبيا من الدم
ريهام : قولي حجه تانيه ده أخويا واكيد لازم اعرف حاجه زي دي

هاجر : لا يا ريهام محدش يعرف المعلومة دي غيري ،عشان مرة كنت خارجين واتعورت ،شوفته قدامي بينهار وبيجيله بضيق تنفس وكان تعبان جدا ولما سألنا الدكتور قال في ناس بيبقي عندها فوبيا من الدم ومراد منهم ، مراد عمره ما عمل تحليل دم غير وأنا معاه عشان كنت بحاول اهديه واخفف عنه ،مراد مستحيل يكون قتلها اصلا وانا واثقة فيه
نظر نحوها مراد نظرة إعجاب وكأنه يتعرف عليها لأول مرة
ريهام : لو سمحت يا مراد احكيلنا حكايتك معاها من الأول
هاجر : مش وقته ومش هنا
ريهام : يعني ايه
هاجر : يعني أنا لازم أمشي أنا ومراد من هنا فورا
ريهام : وبعدين هتروحوا فين وتهربوا لامتي
هاجر : كل اللي أنا طالباه منك تثقي فينا بس مش عايزة حاجه غير كده وتنزلي تشتتي الناس اللي تحت وقوليلهم أننا سافرنا
ريهام : بس .......
هاجر : مفيش بس نفذي وانا هكلمك اقولك الجديد
خرجت ريهام وهي مشتته لا تعرف بمن تثق وعليها أن تصدق من .
هاجر : انا معاك يا مراد ،جنبك مش هسيبك كل اللي أنا طالباه منك تهدي وترجع مراد القوي عشان نعرف نتصرف ونحل كل المشاكل دي "أمسكت يده " وإحنا مع بعض هنعرف نحل كل حاجه خليك واثق فيا
قامت إلي خزانة الملابس وبدأت بإخراج بعض الملابس وأعطاها لمراد
هاجر : غير هدومك لحد ما ألم كل حاجتك عشان هنمشي
جذبها مراد نحوه وقبل رأسها دون كلام ،بدأت هاجر في إخراج ملابسه واشيائه ووضعها في الشنطة بشكل عشوائي وعندما انتهت جلست إلي السرير وبكت ، هي خائفة من فقدانه ربما نقمت عليه من قبل ولكنها الآن تنقم علي الحياة التي تؤذيه ،ظهرت قوية أمامه لأنها تكره رؤيته ضعيف ومستسلم للأمر
ذهبت إلي غرفتها وجمعت كافة ملابسها واشيائها وعادت إليه
هاجر : يالا نمشي حالا
مراد : نروح فين
هاجر : معرفش اي حته بس نخرج من هنا
مراد : طيب يالا انا عندي مكان
خرجا كلاهما مسرعين نحو سيارة مراد التي قادها بسرعة جنونية أربكت هاجر
مراد : متخافيش ،بس لازم نمشي بسرعة
هاجر : أنا خايفة عليك
مراد : انتي جايبة الثقة دي منين مش ممكن اكون بكدب
هاجر : عمرك ما عرفت تكدب وانت باصص في عنيا ،عمرك ما كدبت عليا في حاجه واحساسي بيقولي اني صح
مراد : مش ممكن احساسك غلط المرة دي
هاجر : إحساسي ليك عمره ما خاني
مراد : طب ازاي صدقتي اني قتلت يوسف
هاجر : عشان وقتها كدبت إحساسي
مراد : انا بحبك جدا
هاجر ضاحكة : هو ده وقته إحنا هربانين من جريمة قتل
ضحك مراد بقوة : كل مرة بتفصليني عارفه أنا غلطان اني بقولك حاجه
هاجر : وانا كمان بحبك جدا ، ها رايحين فين بقي
مراد : مبتقوليش جملة وتكمليها ،رايحين شقتنا
هاجر : شقة ايه
مراد : دي شقة اشتريتها زمان لينا بس بعدها يوسف مات وبعدنا
هاجر : ما اكيد كل الناس عارفة مكانها
مراد : محدش يعرف مكانها غير أنا ويوسف الله يرحمه وانتي دلوقتي
هاجر : ودي نضيفة
مراد : نضيفة وفيها كل حاجه ،كنت يقعد فيها بالساعات واتخيلك موجودة فيها وماليها ضحك وحب ،بس طول عمري بدخلها لوحدي
هاجر : وادينا رايحين سوا
وصلا كلاهما للعمارة وصعدا إلي شقتهما التي كانت في آخر طابق يعلوها سطح المبني
فتح مراد الشقة واضاء الانوار  وتعجبت هاجر من صورها المعلقة علي كل ركن صورهم معا في طفولتهم وقبل أن يفترقا صورها وحدها بعد إنفصالهم ، شعرت للحظة أنها تنتمي لهذا المكان وأنها لا ترغب في أن تتواجد في اي مكان سواه
مراد : عجبتك ،بصي ممكن بعد كده تعدلي فيها زي ما تحبي غيري الالوان اعملي كل حاجه علي ذوقك
هاجر : عجبتني جدا كل حاجه فيها شبهي اوي وزي ما بحبها
مراد : عشان أنا عارف كل اللي بتحبيه
هاجر : بدل كده فانت اكيد عارف اني جعانة جدا
مراد : طيب ادخلي غيري وانا هبعت البواب يجيب شوية حاجات
دخلت هاجر وأبدلت ملابسها وخرجت
مراد : هو في حد هربان حلو كده
ازاحت هاجر خصلة نزلت علي عينيها : أنا جعانة جبت أكل
مراد ضاحكا : تقريبا انتي عندك حساسية ضد الكلام الحلو
هاجر : أيوه وانجز عشان جعانة
مراد : انتي إمتي مكونتيش جعانة
هاجر : لا ده إحساس دائم مش مؤقت
تناولت الطعام سويا
هاجر : مراد ممكن تحكيلي علي كل حاجه
مراد : طيب ممكن بكره عشان تعبان جدا وعايز انام
نظرت له هاجر نظرة شك
مراد : متبصيش كده والله تعبان بكره هحكيلك كل حاجه عنها وازاي عرفتها
هاجر : ماشي أدخل نام
مراد : وانتي ؟!
هاجر: هكلم ريهام اطمنها
مراد : تمام
اتصلت هاجر علي ريهام
هاجر : أيوه يا ريهام حصل حاجه عندك
ريهام ببكاء : حصل مصايب
هاجر : في ايه
ريهام : اكتشفوا بصمات مراد في كل مكان وبيدوروا عليه وعمي عرف وتعب وخدناه المستشفى ولازم يعمل العمليه  ..........
Hadeer_saeed