ملاكي الحارس 🙂 الجزء التاسع - اليك القصة
ملاكي الحارس 🙂 الجزء التاسع - اليك القصة
ملاكي_الحارس
الجزء_التاسع
الحب كلمة تتردد دائما علي مسامعنا، البعض يحب نغمته والبعض يتألم عند سماعها ، ولكن من هو غارق فيها ماذا يفعل؟!!! ، أنا غارقة فيه ولا نجاة واتعجب كيف للمرئ ان يستغني عن ذاته ويذوب في شخص آخر ، اني ممتلئة به كل مابداخلي له مشاعري وقلبي حبه يجري في أوردتي ، لا شئ بداخلي يخصني بعد الآن كل شئ يخصه هو وحده .
عبد الرحمن : تحبوا تخرجوا شوية يا هاجر
مراد : ياريت يا عمي
هاجر : لا بلاش أنا عايزة أسافر
مراد : تسافري فين ؟!!
هاجر : لا هنسافر كلنا نغير جو شوية الفترة اللي فاتت كانت صعبة علينا كلنا
سهير : والله فكرة إحنا محتاجين نغير الجو الكئيب ده
نجوي : فعلا والله بس نسافر فين
هاجر : نروح شرم أسبوع ونكتب الكتاب هناك
نظر الجميع إلي بعضهم البعض
مراد بتوتر : متأكده عايزة تروحي شرم
هاجر : أيوه فيها ايه
ريهام : فكرة حلوة جدا ياريت
مراد : طب نروح اي مكان تاني ، بلاش شرم
هاجر : ليه ؟! انت قلقان من حاجه ؟!
مراد بتوتر : لا مش قلقان ، هقلق ليه
نظرت هاجر نحو ريهام وقالت : وأنا حجزت الفندق وجهزت كل حاجه
مراد : فندق ايه ؟!
هاجر : فندق (..........)
مراد : لا طبعا مش هنروح الفندق ده
هاجر : ليه
مراد بعصبية : خلاص اعملي اللي انتي عايزاه
هاجر : بدل كل موافق يدوب نجهز الشنط نسافر ف الفجر وانا كلمت ماما وخالتي ،عشان يسافروا معانا
مراد : ليه كلمتي أحمد ده
هاجر : في ايه يا مراد دا ابن خالتي برده
مراد بعصبية : خلاص يالا نمشي عشان نلحق نحضر الشنط
ريهام همست لهاجر : زي ما اتفقنا
صعدت هاجر لغرفتها وابدلت ملابسها وبدأت تتذكر مراد عندما أمسك يدها وقال لا تفلتي يدي
هاجر : أنت ليه بتقول كده
مراد : عشان مش ضامنك يا هاجر ،مش ضامن إمتي تمشي وتسيبيني ، أنا دايما في قلق امتي هتمشي ، أنا دايما خايف منك وعليكي
هاجر : خايف عليا فهمتها ايه خايف مني دي ؟!
مراد : خايف منك عشان بصراحة مش واثق في مشاعرك ،مش واثق أنك هتفضلي
إقتربت ونظرت في عينيه وقالت : انا المرة دي هفضل مش همشي أبدا ،بس انت متسبنيش ، أنا يمكن بعدت كتير بس المرة دي مش عايزة أبعد عايزاك جنبي وأقرب لي مني يا مراد ، ممكن اطلب منك طلب ؟!
مراد : طبعا طلباتك أوامر يا ست البنات
هاجر : اوعي تسيبني لأفكاري ، أنا كل ما بفكر ببعد ،أنا مش عايزة أفكر ، أنا عايزة أحبك بس
لو لقتني ببعد شدني ناحيتك ،متسبنيش أمشي خطوة بعيد عنك
نظر مراد وجذبها نحوه : انتي مالكيش مكان غير جنبي ومعايا
ريهام : إحم إحم شكلي قطعت عليكم الجو الرومانسي بس في ناس نامت جوه وهي مستنية حضراتكم
مراد ضاحكا : خلاص جايين نصحيهم أهو
أفاقت هاجر من شرودها والابتسامة ترتسم علي ثغرها علي صوت رسالة " تقتلني الغيرة أشعر أحيانا أني أرغب بأن أحتفظ بك بداخل قلبي أرغب في إلا يراكِ أحد ولا ينظر أحد إليك ، أخشي أن يري أحدهم عينيك ويقع في حبك كما فعلت أنا "
ملاكك الحارس 💜
في الصباح رن هاتف هاجر
هاجر : ايوه
مراد : النهار طلع يا هانم ،هنسافر امتي ؟!
هاجر :أيه ده بجد ،خلاص هلبس بسرعة أنا مجهزة كل حاجه
مراد : تمام متتأخريش
هاجر : تمام سلام
مراد : استني ،بلاش تبقي حلوة أوي النهاردة زي كل يوم مش عايز أحمد يشوفك حلوة واوعي تهزري معاه ولا أشوفك باصة عليه فاهمة
هاجر ضاحكة : ماشي فاهمة
ابدلت هاجر ملابسها وأدت فريضتها وجلست بين يدي الله " يارب أنا بحبه ،يارب متحرمنيش منه ،أنا اتحرمت من وجوده كتير ، يارب كل الحاجات الوحشة دي تنتهي أنا مش عايزة غيره "
سهير : يالا يا هاجر اجهزي ،أحمد وخالتك تحت
هاجر : نازله اهو
في الأسفل
أحمد هتيجي معانا يا هاجر
عبد الرحمن : لا المكان زحمة أنا هاجي معاك أنا وخالتك
أحمد : طب وهاجر
عبد الرحمن : مراد هيجي ياخدها
هاجر : بس مراد مقالش أنه جاي
في دخول مراد : لا قولت يا هاجر يالا اجهزي مستنيكي بره
خرجت هاجر وركبت بجانب مراد
مراد بغضب : انا مش قولتلك مالكيش دعوة بيه
هاجر : هو انا عملت حاجه
مراد: لا والله كنتي عايزة تروحي معاه ،وأنا ايه ماليش لازمة
هاجر : هو انا قولت كده يا مراد بس مكنتش عارفه انك هتيجي
مراد : بالعقل كده إحنا مسافرين وانتي عندك زفت فوبيا من السواقة ومبتعرفيش تسوقي مين اللي هياخدك ، هسيبك لأحمد
ضحكت هاجر : لا متسبنيش
مراد بعصبية : متضحكيش
حاولت هاجر كتم ضحكاتها ولكن لم تستطع
لحظات وإبتسم مراد : جايب معايا طفلة والله
هاجر : طفلة مش عاجبك
مراد: لا يا ستي عاجبني جدا ،عاجبني اوي يعني
هاجر : نعم ؟!
مراد : مش قولتلك متجيش حلوة كده ،اعمل ايه انا دلوقتي همشي اتخانق مع الناس
هاجر : طب بص قدامك بقي عشان الطريق
بعد مرور بعض الوقت غطت هاجر في نوم عميق ، ومراد يتابع النظر إليها لا يصدق أنها أخيرا صارت معه ،يعلم أنه أخطأ في حقها ذات يوم ويتمني ان تسامحه ، حتما سامحته والدليل أنها معه وجانبه
وصلا كلاهما بعد عدة ساعات وهاجر مستغرقة في النوم
مراد : هاجر وصلنا اصحي
فتحت عينيها ونظرت نحوه ،إحنا فعلا مسافرين سوا أنا كنت فاكرة اني بحلم
مراد : لا مش حلم اصحي بقي عشان وصلنا
هاجر : طيب أنا عايزة أروح البحر
مراد: ماشي نرتاح شوية ونأكد الحجز وننزل
هاجر : لا دلوقتي ،ماليش دعوة اتصرف
مراد : مش بقول طفلة
هاجر : طفلة طفلة مش مهم بس وديني
مراد : ماشي يالا لحد ما يوصلوا
جذبته هاجر من يده وصارت تركض نحو الشاطئ
مراد : طب أهدي يا بنتي في ايه
تحولت هاجر لطفلة لا تتعدي العشر سنوات صارت تركض وتلعب كالأطفال ومراد ينظر نحوها وقلبه ينبض بقوة وكأنه يقع في حبها من جديد
مراد : انتي هتنزلي المايه كده
هاجر : لا طبعا هقلع الجزمة
مراد ضاحكا : والله مجنونة
بعد بعض الوقت رن هاتف مراد
مراد : يالا بقي عمي وصل ومستنين في الفندق
هاجر : ماشي نغير ونتغدي ونرجع
مراد : ماشي بس يالا بقي
دخلا كلاهما إلي الفندق وكلا منهما يمسك بيد الآخر وهاجر ملابسها مبتلة
ريهام : أيه ده انتوا نزلتوا البحر من غيري
مراد ضاحكا : في طفلة كده اول ما شافت البحر جريت عليه ومعرفتش امسكها
أحمد : تمام خلينا نأكد الحجز
ريهام همست لهاجر : هنفذ النهاردة ...
صعد الجميع إلي غرفهم وتلقت هاجر رسالة
"طفلتي الصغيرة التي كبرت في قلبي كنت ومازالت أحبك ولا أري سواك "
ملاكك الحارس
Hadeer_saeed
لا توجد تعليقات حتى الآن "ملاكي الحارس 🙂 الجزء التاسع - اليك القصة"
إرسال تعليق
ملاحظة للجميع