قصة الميت كامله👽 للناس اللي طلبوها😍 - اليك القصة

قصة الميت كامله👽 للناس اللي طلبوها😍 - اليك القصة

الميت ده اسمي على فكرة
ما تستغربوش من اسمي، اسمي ده ليه حكاية طويلة هحكيهالكم
في البداية أنا عايش مع عم عتمان، عم عتمان مش ابويا لكن هو اللي رباني، امي و ابويا معرفش عنهم أي حاجه غير الحكايات إللي كنت بسمعها من أهل البلد عنهم..
كنت بسمع أهل البلد كانوا بيقولوا، أن أمي و أبويا ماتوا  بسبب عُمدت قريتنا، كان راجل شَراني، بيجبر الفلاحين أنهم يدوا نص محصول الأرض، ماكنش حد يقدر يتكلم خوفاً من بطش العمدة، اي حد كان بيعترض بيترمي هو و عياله برة البلد ..
سألت قبل كده عم عتمان إيه سبب موت أبويا وأمي كان بيرد عليا ويقول لي:
- يابني عيش جنب الحيط احسن ليك وليا احنا مش قد بطش العمدة ورجالته
كنت ألح عليه اني من حقي اعرف مين أهلي وليه كمان اسمي الميت
عم عتمان مالقاش أي مخرج من اصراري والحاحي المستمر فحكالي
قعدت جنب عم عتمان وبدأ يحكي لي:
بص يابني أبوك كان رجل طبيب فلاح بسيط زي باقي اهل قريتنا البُسطة، أمك كانت بتشتغل ف بيت العمدة زي بقيت الستات الغلابة اللي في البلد،  باب الرزق الوحيد اللي كان عايش منه أبوك وامك، حتة ارض كان زرعها قمح، المحصول كان يبيعوا وبتمنه بيعيش بي .. لحد ما أمك تعبت جامد بسبب شغلها الكتير من غير راحه ف بيت العمدة، بعد مُده بسيطة من تعب أمك ماتت، ادفنت و ابوك من زعلوا على اومك وكمان رجالة العمدة اللي جم لأبوك كالعادة عشان يخدوا منه الحصة إللي ملزوم يديها للعُمدة عشان يسلم من بطشوا..
ابوك السنة دي ما كنش المحصول كتير يدوب  هياكله عيش،  فمن الحسرة على موت امك واخدان أرضه من رجالة العمدة مات هو كمان ..
قطعت عم عتمان في اللحظة دي وقلت له:
- ازاي يا عم عتمان و ابويا وامي ماتوا امال انا جيت مين جيت شيطاني 
كمل عم عتمان كلامه وقال:
- يابني ما تصبر انا جايلك في الكلام أهو, بعد ما أمك ماتت بيومين أهل البلد جولي، وقالوا إن في صوت غريب جاي من قبر الست إحسان اللي هي أمك، رحت معاهم عند القبر، الصوت كان صوت عيل بيعيط، فتحنا الباب، لقينا عيل صغير مرمي على الأرض وكمان ملفوف بحتة قماش أبيض..
فتحت بُقي من الصدمة ف اخر كلمة قالها عم عتمان وقلت:
- يعني الطفل ده يكون أنا
رد عم عتمان وقال:
- أيوة يابني هو أنت، خدتك وربيتك بعد ما كل أهل القرية رفضوا يخدوك، ومن ساعتها واهل القرية بينادو عليك بسم الميت

ده كان سبب تسميتي بالميت، وكمان إللي ما قلتوش، أنا بشوف حاجات انتم مش بتشفوها، يعني بشوف كيانات غريبة اوي، ف الاول وانا صغير ما كنتش فاهم ايه ده، لحد ما حكيت لعم عتمان وقال لي إني أنا غير اي حد أنا اتولدت داخل الترب وده كان سبب اني يكون عندي ميزة مش عند أي حد، حاجه زي كشف حاجب العين اللي بيمنعنا أننا نشوف العالم الاخير، لكن أنا بشوف الجن عادي جدا، ومش بخاف منهم، كمان بشوف امي وابويا كل يوم، كانوا بيطلبوا مني اني  لازم اجيب حقهم  من العمدة..
كنت بسأل إزاي هجيب حقكم من راجل مُفتري زي العمدة كانوا ردهم عليا، أن هيكون ليا خُدام كتير من الجن، هيساعدوني بس لما يجي الميعاد، و لحد اليوم ده ما يجي كنت بتعلم حاجات كتير منهم عشان يوم ما يجي ميعاد الانتقام اكون جاهز ليه..

******

طقوس كل ليلة لازم اعملها
الطقوس دي بتقوي من خُدامي من الجن، بنزل كل ليلة بليل، ارض صحرا بعيده عن عين الناس،  بتجرد من ملابسي، وبيكون معايا قطط بدبح القطط، و بالدم كنت بحطه على جسمي، مع رسم نجمة سداسية بدم القطط، اقعد طول الليل أردد ترانيم اتعلمتها من خدامي من الجن..
الترانيم دي كانت زي غذاء للجن مع كل كلمة منها بتقوي من خُدامي وكمان بتقويني أنا كمان..
فضلت على الحال ده اكتر من سنتين لحد ما جه اليوم ده.

جالي خادم من خدامي  و بلغني باخر حاجه هتعلمها
علمني أعمل ازاي يد المجد..
لما سألته ايه يد المجد دي قال لي
إن دي هتساعدني على التخفي، ادخل اي مكان ومحدش هيقدر يشوفني.
لما سألته كمان ازاي هعملها قال لي
يد بتتقطع من شخص مجرم وبطريقة معينة بتتحضر بيها
الطريقة دي هي؛
بعد قطع الايد الشمال من المجرم، بتتنقع في الملح لمده وبعدها شمع بيتعمل من دهن الميت، وبعدها بسيح الشمع على الايد، وتفضل مُعرضه للشمس ليوم او اتنين ويتكون جهزة بعد كده ..
يكفي بعد كده إني امسكها وانا داخل اي مكان ومحدش هيقدر يشوفني..

كانت المشكلة إزاي هجيب ايد مجرم، الخادم قال لي ما اقلقش من الحكاية دي هو هجيب لي الايد دي  لحد عندي..

حضرت يد المجد، واطلب مني اخدها واروح على دوار العمدة
طبعا ما حدش هيشوفني من رجالة العمدة..

دخلت وكنت مجهز أعمال السحر السفلي إللي هحطها في كل ركن من البيت
كان معايا ورق مكتوب عليه تعويذ سحرية، دم قطط، حطيت في كل ركن ورقة، دم القطط بردوا حطته في كل حته، بخور عملته مخصوص كنت بحرقه ف  كل أوضة وركزت اكتر على أوضة نوم العمدة، حيطت فيها بخور كتير، وكمان دم القطط حطته على السرير و لبسه ...

خلصت كل ده وخرجت من بيت العمدة، ودلوقتي مستني بعد أيام بسيطة هلاقي جاي لي وطالب مُساعدتي ..

اصل نسيت اقولكم اني  ساحر القرية دي دلوقتي، الشيخ البركة اللي سره باتع، يعني ما فيش غيري إللي هيجيلوا العمدة..
ده غير أن العمدة ما يعرفش ان انا  ابن الراجل اللي كان سبب فيه موته وموت أمه كمان..
عم عتمان رباني وداره الحكاية دي عن العمدة ..
فخليني اتفرج بقى على إللي هيشوفه العمدة في الايام اللي جايه..

*******

في بيت العمدة الساعة حوالي واحدة بعد نص الليل
صحي العمدة في الوقت كده على صوت غريب ف الاوضة، كان صوت قطه، بعد ما قعد على السرير وهو بيُفرك عينه، الصوت بقى اكتر من الأول، بقى صوت لأكتر من قطه جاي من الاوضة، ما كنش عارف صوت جاي من انهي حته تحديدا الصوت منتشر  في جميع أركان الاوضة..
العمدة ندى على رجالته، محدش جالو، قام من على السرير واتحرك، لسه هايوصل لباب الاوضة عشان يفتحه، لقي الباب بيتفتح ببطء شديد، وقف مكانه، الباب اتفتح على مصراعيه ومحدش دخل..
اتحرك كام خطوة، في اللحظة دي شاف خيال اسود واقف عند باب الاوضة .
الخيال كان سادد جزء كبير من النور اللي جاي من برة الاوضة..
شوية ولقي الخيال الاسود اختفى من عند الباب، فعشان كده النور اللي جاي من برة غطى الاوضة، بص حولية، عينه جات على المرايا اللي كان منعكس عليها صورة لوحدة ست وقفة بكل ثبات ورا ضهر العمدة!!
بسرعة العمدة أتلفت وراه، ما كنش في حد ورا، بص تاني على المرايا لقي الست لسه واقفة ورا ضهره!!
المرة دي شاف ايد الست وهي بتتحرك، حس بملمس ايد سُخنه كأنها جمرة من النار مسكت رقبته..
خنقته الايد بكل قوة !
مع الخانقة كان سامع صوت حشرجة خارجه من الست اللي وراه، ما حسش باي حاجه غير والدنيا بتسود في وشه..

صرخة خرجت من بوق العمدة وهو بيفوق من الكابوس المزعج اللي ملزمه بقالو فترة
كلم حد من رجالتهُ اللي عنده ثقه فيه، حكى له عن الكوابيس اللي بتلاحقه عشان يقترح عليه بعد كده إنه يروح لواحد بركة ده الوحيد إللي هيقدر يفسر له اللي بيمُر بيه..
حذره العمدة أنو يخرج الكلام ده بره احسن هيكون مصيره الموت، قرر العمدة إنه هيروح للبركة ده النهاردة اخر الليل عشان محدش يعرف بأي حاجه من أهل القرية احسن هتكون فضيحة للعمدة..

...........
( 2 )

راح العمدة هو و الغفير عند بيت البركة، دخلوا البيت، استقبلهم حد من مُساعدين البركة طلب منهم ينتظروا شوية، غاب عن نظرهم ورجع لهم نفس الشخص اللي استقبلهم و خلاهم يدخلوا..
لما دخلوا شافوا الاوضة اللي مساحتها كبيرة ومافهاش اي اثاث غير دكة صغير قاعد عليها البركة..
العمدة والمساعد لما دخلوا الاوضة كانوا سامعين صوت غريب زي الهمس الخفيف، قعده يتلفتوا يمين وشمال عشان يعرفوا الصوت ده مصدره ايه لكن من غير فايدة
الصوت لسه مستمر من غير ما يعرفوا جاي منين..

أتكلم البركة وقال:
- قاربوا ما تخافوش من الأصوات إللي سمعنها محدش هيقدر يؤذيكم
طلب البركة من العمدة أن الغفير يخرج ويفضل هو بس معاه، العمدة قال للغفير يستناه برة، خرج فعلا وبقى العمدة والبركة هما اللي موجودين ف الاوضة..

فضلوا ساكتين محدش بينطق بكلمة لحد ما البركة كسر الصمت وقال:
- قولي مشكلتك
خد العمدة نفسه وبدأ يحكي للبركة:
- بقالي فترة بشوف حجات مش قادر أفهمها، بشوف ست شكلها غريب، بصحه على صوتها وأنا مفزوع، قطط كتير بلاقيها ميته حوالين البيت وفي اوضتي كمان، ده غير أني بحس دايما بحد مرقبني
سمع البركة كلام العمدة وهو بيتمتم كلام ف سره بعدها وقال له:
- ممسوس الحل الترضية
سأل العمدة وقال:
- ترضية ايه مش فاهم
رد البركة:
- هتروح لأرض فضا ما فهاش أي بني آدم، هتختلي بنفسك يوم كامل هناك، ادبح قط او اتنين، دمهم تغرق بي جسمك كله...
البركة مده ايدو للعُمدة وقال له:
الورقة دي هتقراها وانت بتغرق جسمك بدم القطط، بعدها هتشوف حاجة ف حلمك هتجيلي تاني يوم لما تشوف الحلم وتحكي إللي شفته بالتفصيل.

خرج العمدة من بيت البركة وهو تايه، مش بيرد حتى على الغفير، لحد ما اتكلم وقال:
- الكلام اللي هاتسمعو ده حسك عينك يطلع برة، انا طالب منك تجبلي قط او اتنين من غير ما تسأل ليه، هنزل الجبل دلوقتي و حسك عينك حد يعرف حاجة

انصدم الغفير من كلام العمدة، نفذ اللي اطلب منه من غير ما يفتح بُقه، جاب للعمدة فعلا قطتين وحطهم ف قفص صغير واداه للعمدة ومشي زي ما طلب منه ..
راح العمدة بعدها لأرض صحرا ورا الغيطان، عمل اللي اطلب منه بالحرف، جرد نفسه من اي لبس، والدم غرق بي جسمه، الورقة اللي معاه ردد منها كلام ما كنش فاهم منه حرف كان بينطقو بالعافية..
بعد ما انتهى حس بالنوم هجم عليه فجأة
نام فعلا العمدة، ثواني وفاق العمدة على صوت واحدة ست بتنادي باسمه، أتلفت حوالين نفسه عشان يعرف الصوت جاي منين، واحدة ست واقفه بعيد عنه بخطوات، شعرها مغطي وشها..
الست نزلت على الأرض وزحفت زي الأطفال
العمدة واقف زي المشلول ولا عارف يحرك رجله، الست بتزحف عليه، وصلت له ووقفت، حركت أيديها على شعرها وفرقته عشان يبان وشها الاسود اللي زي الفحم !!

الست بدأت تتكلم بصوت أشبه بالحشرجة وقالت:
- مش فاكرني كده تنسى إحسان بردو ف حد نفسه يشوفك من زمان
بعد ما خلصت اخر جملة ظهر من العدم راجل عجوز
العمدة دقق ف ملامح العجوز واتكلم وصوته كان بيترعش من الخوف:
اننننننت لا مستحيل اكيد انت شيطان

ضحك العجوز هو والست وقالوا:
- الميت مش هيسيبك ف حالك غير لما يخليك مجنون تجري ف الشوارع وتنطق باسمنا زي المجاذيب

خلصوا كلامهم عشان ينتشر أصوات صرخات كتير ف المكان
مع الصرخات كان بيظهر ايادي من تحت الأرض عشان تكشف عن كائنات ابشع من ألف شيطان اقزام اشكلهم زي القرود ..
العمدة جري وهو بيصرخ عشان ايد من الأيادي اللي بتخرج من تحت الأرض تمسك فيه ويقع على الأرض ..

كل حاجه اسودت ف وشه فاق وهو موجود ف نفس مكانه ف الصحرا، جسمه عبارة عليه اثر حوافر كانت بتنهش ف جلده..
طلع يجري على بيته بالمنظر ده زي المجانين
أهل القرية كلهم شافوا على المنظر ده
بيجري و بيصرخ بسم وحده اسمها احسان وعجوز والميت !!

من يومها والعمدة بقى زي المجاذيب بيلف على البيوت، يصرخ ف أهل القرية وبيترجاهم أنهم يلحقوا وينجدوا من الميت والعجوز واحسان...

أما عني أنا البركة أو الميت
فخلاص خدت حق امي وابويا وحق كل فلاح اتظلم من العمدة

كنت قاصد اني اقنعه انو ممسوس والحل ف الطقوس اللي طلبتها منه يعملها، ده بقى عشان يعيش زي المجنون لما يتمكن منه خدامي ..
 
ونجحت ف ده واهو بقى مجنون بيجري ف الشوارع
ويهلفط بكلام زي

احسان، الميت، العفاريت هيموتوني، حد ينجدني منهم
ومحدش بيبص ف وشو ولا بيعبره
هو ف حد بردو بياخد على كلام المجانين !!

اتمنى القصة تعجبكم منتظر رأيكم 😃⁦❤️⁩

محمد مهني

الميت