قصة الماضي 🌸الجزء الاول و الثاني🌸 - اليك القصة

قصة الماضي 🌸الجزء الاول و الثاني🌸 - اليك القصة

الاول والتاني
أجرت اوضه  بدل سكن المدينه الجامعيه علشان اعرف اذاكر في هدوء .. حياه روتينه،بصحي ،أروح  الجامعه ،أذاكر،واحيانا أنظف الاوضه كل جمعه بكره   التنظيف بس مش بعرف أذاكر الا والمكان مرتب لكن الجمعه دي كان التنظيف مختلف كنت عايزه اغير ملايه السرير وبرفع المرتبه  فلقيت ورقه اسنغربت  مين حط  الورقه هنا... ممكن يكون اللي مأجره منه الاوضه  ؟ أفتحه ولا ممكن يكون حاجه خاصه..غلبني فضولي وفتحتها ولاقيت خطً مش مترتب  ومبعثر  وكأن اللي بيكتب كان في قطر .. مش مهم هحاول اقرأها.

(مين فينا قرر يختار عيلته مين يقدر يشاور علي اتنين ويقول دي تبقي مامتي وده هختاره  يكون ابويا ..تفتكروا اديسون مخترع المصباح لو اختار ام تانيه غير امه يمكن كنا هنعيش في الظلمه لانها مش هتجشعه زي امه ! يمكن هتلر لو اختار اب مكنش بيضربه في صغره بطريقه عنيفه ولا الأم اللي كانت بتشجعه يكمل تعليم في معهد الفنون تموت بدري مكنش هيبقي فيه حرب عالميه...اكيد مكناش هنسيب  اغنى رجل في العالم  حد يختاره كده بالساهل... يمكن كان في طبقه هتتظلم ومحدش هيختارها وهتفضل من غير اطفال ..يمكن علشان كده ربنا قدر لينا اهالينا..حاجه مش بأختيارنا يا خيار يا فاقوس زي ما بيقولوا مع اني محبش المثل ده علشان فيه ظلم للفاقوس علشان  ليه أهميه وفوائد كتير زي الخيار ده كمان اتذكر في القرآن..يعني الفاقوس ميقلش حاجه عن الخيار.. المهم أن  حظي طلع فاقوس قدري اني اكون مع أندل اتنين كانوا السبب فانهم يجبوني الدنيا دي بكرهم...اكيد اللي وصل للورقه عايز يعرف بكرهم  ليه دور علي الورقه التانيه في احتياجك التاني علشان تعيش   )
اييييه ده!!!
ايه  الورقه دي ؟ومن كتبها؟ وفين الباقي؟ وهو ايه الاحتياج التاني للانسان  وليه بتكره او بيكره اهله كده  كل الكره ده !!  اسئله كتيره خطرت في رأسي والفضول يقتلني
وقعدت افكر ايه الاحتياج التاني علشان الاقي الورقه التانيه بس غلبني النوم

‎انتهي الجزء الاول

#الماضي
فكروا كده ايه الاحتياج التاني علشان تلاقي الورقه علشان انتو كمان  تعرفوا هو ليه بيكره  اهله
......................

صحيت بدري وروحت الكليه دخلت المحاضره بس عقلي مشتت بفكر  في الورقه..لما المحاضره خلصت كنت عايزه اجري بسرعه علي الاوضه علشان ادور علي الورقه التانيه في كل مكان بس صاحبتي وقفتني  وقالت: يلا ناكل انا سهرت امبارح لغايت الصبح بذاكر مش هعرف اكمل اليوم من غير نوم وكمان  مش هاكل.
ايووة ايوة الاحتيااج التاني ازاي انا غبيه كده ...  جريت بسرعه  للاوضه  وعيني وقعت علي التلاجه دورت فيها ملقتش حاجه .. يا تري هي فين  ؟ بصيت تحت التلاجه لاقيتها متثبه بحاجه في التلاجه من تحت.. اخيرا لاقيتها
تعالي ده انتي شغلتيلي بالي من امبارح

(واضح ان اللي بيقرأ اوراقي عنده فضول واصرار بما انك لاقيت الورقه التانيه.. اهلي كانوا اسوء اتنين اختارهم ليا القدر ..عمرك كرهت حد من غير ماتشوفه.. انا كرهتهم من غير ما اشوفهم..اترميت قدام ملجأ من غير هدوم مع ورقه مكتوب عليها جبناه غلطه ربوه او ارموه لو كانوا ودوني الملجأ علشان فقر او حد منهم مات والتاني مش هيعرف يربيني يمكن مكنتش كرهتهم.. شوفت فيلم كان فيه واحده في الملجأ زي بس مامتها سابت في رقبتها سلسله علشان لما ترجع تاخدها تعرفها.. حتي ما سابوش سلسله مكنش عندهم النيه للرجوع رموني بقلب جامد..ليه جابوني مدام مش عايزيني ليه مقتلونيش اعتقد انهم بالوحشيه والقرف اللي يخليهم يقتلوا طفل بدم بارد بكرهم وهفضل اكرهم طول عمري ...فتره الملجأ كانت وحشه جدا حتي الملجأ مختاروهوش كويس يمكن قاصدين يختاروا  اوحش ملجأ..كنت انطوائي جداً مكنش ليا صحاب وكنا بنضّرب بقسوة انا متاكد ان الضرب ده مكنش هيبقي عقابي لو قتلت حد.. طلعت من الملجأ ده بتلت حاجات  اولهم انهم علمونا القرايه وتاني حاجه الكتب اللي كانت في أوضة المسوؤله  كنت بسرق منهم واقرأ وارجعهم تاني  وتالت حاجه صاحبي في الملجأ اسمه نور هو اكبر مني كان حنين جدا كنت بشوفه الامان في المكان ده ، كان بيدافع  عني كتير كان بيسرقلي  اكل وكتب  لما كنت بضرب كان بيحضني  جامد ويقولي متخافش هخرجك من هنا وهنقتل الست دي قريب ويضحك كنت انسى الوجع واضحك معاه لما كان بيضرب كنت اعيط عليه جامد  يقولي هو في راجل بيعيط وبعدين انا مش موجوع ضربهم مبقاش يوجعني  لكن هو كان بيكدب لان ضربهم اثر فيه المره الاخيره ومات ايوة مات ومحدش اتعاقب ،فاكره اليوم ده بتفاصيله  كنا هناكل اليوم ده بسله برغم ان نور مش بيحب  البسله لكن كان بياكلها  علشان ميفضلش جعان كنا بنجيب الاطباق وهو ماسك الطبق  وبيهزر معايا اتكعبل ووقع والطبق وقع علي الارض وبهدل الدنيا مش بس كده ده وقع كمان علي جزمه ماجده ودي المسؤوله عننا بنسميها "أُمنا الغوله" كانت طويله ووحشه كلنا كنا بنخاف من صوتها بصت علي جزمتها ولاقتها كلها صلصله مسكت الطبق وقعدت تضرب بيه علي  راسه حاولت ابعدها لكن كانت زي الاسد اللي مسك فريسه ومحدش كان بيحوش وانا محاولاتي في ابعادها كانت بتفشل لغايت ما  صراخ نور سكت كل حاجه سكتت لدرجه تحسسني اني  أطرشيت لمده خمس  دقايق وقفت مزبهل وبعدين عيطت ومسكت ايديه وقعدت انادي  عليه نووووور نوووور لكن هو مردش عليا شدوه  مني بالعافيه وخدوني واتحبست في اوضه اسبوع،  طفل عنده ١٧سنه
يشوف احن انسان عليه وصاحبه الوحيد  بيتقتل  قدام عينيه. .. اشوفه بيصرخ  ومقدرش اعمله حاجه محدش اتحرك من مكانه علشان يساعدني كلهم حيوانات ميفرقوش عن اللي موتته في  حاجه.. صورته مش بتفارق خيالي بحلم بيه كل يوم.. علشان كده قررت انتقم قررت اخد حق نور
)هتلاقي الورقه التانيه في شي بتبص عليه كتير ودايما قلقان منه  في منه بيتلبس  وفي منه وبيتعلق  ! )
Menna_elshamy
‎ الجزء_التاني
الماضي
فكروا ايه الحاجه دي علشان نوصل للورقه التانيه ونعرف انتقمت ازاي 😅